चितवन, सौराहा ।
मर्यादित महिनावारीका विषयमा जनचेतना अभिवृद्धि गर्ने उद्देश्यले सञ्चालित पत्रकारहरूका लागि मिडिया फेलोशिप कार्यक्रम २०२५ सम्पन्न भएको छ । मे १० देखि १३ (२०८२ वैशाख २७ देखि ३०) सम्म चितवनको सौराहास्थित होटल आमा गार्डेनमा सम्पन्न कार्यक्रममा महिनावारी विभेदलाई बहुआयामिक पाटोसँग जोडेर छलफल भएको थियो ।
मिडियामार्फत मर्यादित महिनावारीका विषयमा गहिरो बहस सुरु गर्ने, सञ्चारकर्मीहरूलाई मानव अधिकारमा आधारित दृष्टिकोणबाट सामग्री निर्माणमा उत्प्रेरित गर्ने र सामाजिक कलंक तथा विभेद अन्त्यका लागि सञ्चारलाई सशक्त माध्यमको रूपमा प्रयोग गर्ने उद्देश्यले कार्यक्रम आयोजना गरिएको थियो।
देशभरबाट छानिएका १८ पत्रकारहरूको सहभागितामा आयोजित प्रशिक्षणमा मर्यादित महिनावारीको अवधारणा, राष्ट्रिय तथा अन्तर्राष्ट्रिय नीतिगत सन्दर्भ, तथा पत्रकारिताको भूमिकाबारे विस्तृत छलफल गरियो। सहभागीहरूले महिनावारी विभेदले ल्याएका सामाजिक विभेद, कानुनी खाडल र मर्यादित महिनावारीमैत्री प्रभावशाली सामग्री निर्माण गर्ने प्रतिबद्धता जनाएका छन्।
